الاي بي في دواجن التسمين

 

الاي بي في دواجن التسمين 

الاهم من الدواء في حالة الاي بي هو تدفئة المزرعة بدون تكتيم لان كلما قلت درجة حرارة المزرعة كلما زاد النافق

 فهل تعلم أن :- نزول درجة الحرارة الي ١٦ درجة مئوية اثناء إصابة الاي بي قد يكون كفيل بإحداث نافق ٥٠ ٪ من القطيع مع وجود التهابات كلوية شديدة وتجبنات عالية جدا في الجهاز التنفسي و الأكياس الهوائية واغشية القلب والكبد 

 ‏

ليه نزول الحرارة بيرفع النافق؟ 

1- بيدي فرصة اكبر لتكاثر الفيروس في المزرعة

2- بيزود تأثير الحمى ولذلك بتلاقي تجمع الفراخ جنب الحوائط والاعمدة وتحت الدفايات لتدفئة جسمها

3-بيقلل شرب الماء وبكدة بتزيد التهابات الكلى وكمان هيكون اي علاج في ماء الشرب مش فعال قوي

4-بيزود نشاط الاي كولاى وبالتالي بتزيد التجبنات في التجويف الصدري والبطني

5- بيزود تأثير الاي بي السلبى على القصبة الهوائية

بس خلى بالك :- ماينفعش تكتم العنبر علشان تجمع حرارة لان التكتيم بردة بيزود النافق لانه :-

1- بيزود الامونيا اللي بتدمر الاهداب التنفسية او على الاقل بتقلل حركتها ( وهي المسئوله عن طرد اي مواد غريبة بما تحمله من فيروسات) وبالتالي بتقل المناعة الموضعية للجهاز التنفسى 

 2-بيحفز تكاثر الخلايا الطلائية في الشعب الهوائية وبالتالي بيزود سمك جدران المجاري التنفسية وتسبب ضيق في التنفس

 ‏

3-بيزود حمل الهواء من الفيروسات وبالتالي بيزود العدوى

4- بيقلل نسبة الأكسجين وبيزود نسبة الغازات الضارة وبالتالي بيزود النافق نتيجة الاختناق 

لما ترفع حرارة مزرعتك بيقل تجمع الفراخ 

والفراخ بتفرد احسن في المزرعة و بيزيد شرب الماء وبالتالي بتزيد فاعلية الدواء في ماء الشرب وبتقل مشاكل الكلى و الاي كولاى وما يصحبها من تجبنات

خطأ شائع من بعض المربين:- وهي رفع الحرارة في الاي بي بشكل مبالغ فيه ظنا منهم ان ده أفضل للفراخ ولكن على العكس فكل ما زاد عن حده انقلب ضده وزي ما برودة العنبر بتزود النافق فبردة لو زادت الحرارة عن ٢٨ الي ٣٠ درجة هتزود النافق لانها هتشكل عبء على الجهاز التنفسي للفراخ (المريض اصلا) للتخلص من الحرارة الزائدة عن طريق اللهاث دا غير الإجهاد والتثبيط المناعي الناتج عنها