مشاكل تفريغ الحم في دواجن التسمين

 

مشاكل تفريغ الحم في دواجن التسمين 

مشكلة هنشوفها كتير الايام الجاية... وشكوي هتتكرر كتير 

بيكون الصدر مكتنز والفرخة مصدرة وبعدها بكذا يوم نلاقي الصدر سيف

بتشوف الفراخ ظاهريا تحس ان وزنها ٢ كيلو ونص ولما تيجي توزن تلاقيها مضربة كيلو و ٧٠٠ 

تكون وازن عمر ٣٥ يوم تلاقي الوزن داخل علي ٢٢٠٠ وتستني تبيع علي عمر ٣٩ يوم تلاقي الوزن ١٩٠٠  

 

هي الفراخ ليه بتفرغ ؟ 

ليها اسباب كتيرة جدا ولكن هنتكلم في البوست ده عن واحد من اهم الاسباب وهو الاجهاد الحرارى 

هل لو الحرارة عالية تأثر علي وزن الفراخ ؟ طبعا ... ليه بقي ؟ 

بص يا سيدى ... الحرارة بتعمل حاجتين خطرين جدا 

١- بتكسر عضلات الجسم وخصوصا عضلات الصدر علشان توفر احماض امينية للكبد يستخدمها في انتاج السكر لامداد الطائر بالطاقة  وده تحت تأثير هرمون الكورتيكوستيرون 

٢- بتقلل تكوين العضلات لانها بتقلل نشاط الجين المسئول عن تكوين العضلات (myogenin) وكمان بتقلل احد العناصر الهامة المحفزة لنمو العضلات وهي insulin like growth factor 1 (IGF-1)

يعني الحرارة باختصار بتزود هدم العضلات ويتقلل بناءها ... وعلشان كدة الفراخ بتفرغ 

طيب ما انا عنبرى مكيف والحرارة فيه مظبوطة جدا والفراخ فرغت ... ايه السبب ؟ 

ما احنا قولنا يا سيدى ان الحرارة مش السبب الوحيد وان فيه اسباب تانية هنتكلم عنها في بوستات تانية  ... بس بردة ممكن يكون عنبرك مكيف والحرارة مظبوطة بس الرطوبة عالية و سرعة الهواء منخفضة وعلشان كدة هتكون قراءة الترمومتر وهمية ومش بتعبر عن مدى راحة الفراخ لان احساس الفراخ بالحرارة مش متوقف علي الحرارة بس ولكن الرطوبة وسرعة الهواء كمان  ... يعني هيكون فيه اجهاد حرارى علي الرغم من ان قراءة الترمومتر مظبوطة والفراخ هتفرغ بردة 

وبردة ممكن تكون حرارة هواء المزرعة مظبوطة ولكن حرارة الفرشة عالية جدا واحيانا بنشوف ناس بتخلي سمك الفرشة في الصيف حوالي ١٥ سم ! طبعا بردة هتكون قراءة الترمومتر وهمية وهيحصل اجهاد حرارى وتفريغ 

طيب نعمل ايه علشان نتفادى التفريغ الناتج عن الاجهاد الحرارى ؟

اولا:- نتفادى الاسباب اللي ممكن تسبب اجهاد حرارى من تجهيزات للعنبر ونتأكد من كفاءة نظام التهوية والتبريد ودى اتكلمنا عنها في بوستات سابقة علي صفحة المعمل ممكن ترجع لها 

ثانيا :- نأخد الاجراءات اللازمة لتخفيف اثار الاجهاد الحرارى ودى بردة اتكلمنا عنها كتير علي صفحة المعمل 

ثالثا:-  ودى خطيرة جدا - من بعد ما توصل لوزن ١٩٠٠ جرام ... لازم توزن يوميا علشان تشوف تتأكد ان الزيادة اليومية في الوزن ماشية بشكل طبيعي 

 لو لقيت الزيادة اليومية في الوزن مش مظبوطة ... لازم تبلغ الدكتور المتابع بالوضع بسرعة علشان يقدر يساعدك في اتخاذ القرار العلاجي الصح بسرعة 

ملحوظة :- الفراخ اللي بتفرغ اكتر من ١٠ %  الي ١٥ % من وزنها نتيجة الاجهاد الحرارى ( يعني  وزنها بينزل من ٢ كجم الي ١٨٠٠  الي ١٧٠٠ جرام  مثلا ) بيكون من الصعب جدا انها ترجع طبيعية تاني وقرار البيع بيكون افضل مليون مرة من قرار العلاج